鴻圖文具禮品公司

呢間鋪頭入面好逼，但絕對係出名既文具鋪，有唔少人會黎搵野，因為呢到真係有賣好多平時你唔會搵到既野！

首先一般文具呢到當然有啦。其他雜物雖然呢到都好多，但無謂多講，因為我最鐘意、最常睇同最常係到買既野，係文件夾。okok我d嗜好係咁怪品味係咁獨特份人係咁變態架喇，但係文件夾真係好重要，我都唔明點解冇人會重視。你去中華書局果d乜乜物物大書局，d文件夾賣來賣去都係果幾個大牌子，d厚夾又唔好揭喎，你有揭過d 10cm厚文件夾你就知，d扣好鬼屎你揭到中間一定會kick住，因為果個牌子d夾係咁加麻！但係鴻圖就有唔同牌子唔同款既文件夾賣，D字扣又有，O字扣又有，滿足晒唔同需要。

而最緊要既係，呢到有得賣我最鐘意果種clear book，又叫display book，即係有塊透明膠俾你攝文件係中間俾人睇果隻！而最最最最緊要既係，佢仲要有厚版80頁clear book！一般鋪頭好少有clear book，就算有都係得十靚頁，呢到有不特止仲要有厚版！我二話不說就買左一本，將由幼稚園開始既成績表獎狀畢業証書等等通通攝晒入去。

不過黎呢到買野，其實你都唔預自己入去搵，事關入面真係好細好逼，d貨又亂，就算你問店主有冇賣乜乜物物，佢自己都要搵一大輪先搵到俾你，好在店主知自己d貨大概擺咩位咋！